زي ما قولنا من شوية فكل إعلان تقدر تقدر تحط عليه اسم أو علامة مميزة كدة
تقول بيها الإعلان دة مبني على فلان
ممكن المطرب
المخرج
الديكور
الفكرة
أبطال الإعلان و النجوم
والحقيقة إن كل العناصر دي في إعلان فودافون مميزة بكل تأكيد
إعلان من إخراج محمد شاكر خضير
صوت عمرو دياب و بطولة الإعلان محمد صلاح.. و اللي بالمناسبة دي مش أول مرة يجتمعوا في إعلان لفودافون.. و اجتمعوا قبل كدة في إعلان لنفس الشركة و مع نفس المخرج
الفكرة مش جديدة و لكن لطيفة من إبداعات Wunderman Thompson
تصوير بوش روزفيلت و فيكتور كريدي
مونتاج أحمد حافظ و ياسمين يونس
عناصر وجودها لوحده كافي ينجحلك الإعلان بدون حاجة لإبداء أسباب
لكن لما كل العناصر دي تجتمع على تنفيذ إعلان من كلمات نصر الدين ناجي
فعنصر زي دة لوحده كافي ينقل نظرتك للإعلان لزاوية تانية تماماً
عشان لازم نكون مع بعض.. عشان شايلانا نفس الأرض
و بحتاجلك و تحتاجلي.. ما بيننا ألف حلقة وصل.. و بشبهلك و تشبهلي في حب الخير و طيبة الأصل
طب افتح بيبان قلبك و اعرفني.. أنا إنسان زيك
كتر خير الناس.. لسة الدنيا فيها عيون تضحكلك.. و قلوب صافية و عوزالك كل خير
دور جوا ذاتك.. أهراماتك
كل المفروض مرفوض.. اثبت للعالم إنك موجود
و دة كله على سبيل المثال و ليس الحصر..
نصر الدين ناجي هو شخص كلماته عاشت جوانا.. لمستنا و غننياها واتحركنا بيها على مدار سنين كتيرة من غير ما نعرفه بالقدر اللي يستحقه.. و وبالذات بالمقارنة بنماذج تانية واخدة السيط و التركيز و الشهرة كلها بدون ما يكونوا بيقدموا أي حاجة ليها وزن
الإعلان للوهلة الأولى هتلاقيه قريب من إعلان السنة اللي فاتت.. نفس المطرب.. و نفس ألحان عزيز الشافعي بالإضافة لكلماته.. لكن السنة دي في رأيي كلمات نصر الدين ناجي السنة دي هيكون عندها القدرة إنها تستمر و تخلد
نقطة أخيرة وهي المواقف وال insights اللي فريق Wunderman Thompson قرروا يستخدموها في الإعلان.. علاقة الأصدقاء و خصوصاً البنات ببعض و طبيعة المواقف اللي بتجمعهم.. زي قرارات السفر المفاجيء.. السند يوم الفرح.. مرور حد منهم بمشكلة في علاقة عاطفية.. الجزء الخاص بعلاقة الأم بأولادها.. تفاصيل كتيرة.. منقدرش نقول إنها مبهرة.. لكن وجودها كمعادل بصري للأغنية عزز المعنى المقصود.. ومن العناصر اللي دعمت الخليط دة بشكل كبير مونتاج أحمد حافظ و ياسمين يونس.
(حقيقي شكراً من هنا لبكرة)