top of page
  • Mohamed Ahmed

تحليل إعلان شركة وي الجديد (غير أي حد)


مبدئياً كدة إنت لو بتعمل إعلان لشركة اتصالات هتجيب هند صبري و الباقي مقدور عليه

--------------------------------------------------------------------------------------

من 5 سنين كانت البداية لشركة we أو المصرية للاتصالات "سابقاً" بعد ما قررت تكون أول مشغل اتصالات متكامل في مصر.



وكانت الانطلاقة من خلال أغنية أكتر من كونها إعلان وكانت بعنوان "إحنا منك"

و الحقيقة إني على المستوى الشخصي حبيت الأغنية و استمتعت بيها للدرجة اللي خليتني ابقى لحد النهاردة محتفظ بيها على موبايلي و بسمعها من وقت للتاني.

و النهاردة و بعد 5 سنين we قررت تحتفل بإنها بقت بتخدم 12 مليون مصري

و بعد ما كان شعارهم "قبل أي حد"

بقى شعارهم "غير أي حد"

و شافوا إن دي فرصة مناسبة كمان لتغيير الـ logo و اللي لو لو تفتكروا وقت نزوله خد جرعة سف لا بأس بها من الناس .

و من بداية السنة الجديدة كان التمهيد من خلال billboards في الشوارع

لحد ما الإعلان نزل يوم 10 يناير

--------------------------------------------------------------------------------------

الإعلان من بطولة "بالترتيب"

نادين نجيم.. هند صبري.. عمرو سعد.. مروان موسى.. هدى المفتي.. و نور النبوي

و اللي بيظهروا و هم بيغنوا كلمات حماسية مضمونها إنهم غير الدنيا و إنهم بدأوا لوحدهم و صدقوا فنفسهم عشان كدة وصلوا وعدوا و دلوقتي وقتهم

و في النص مروان موسى بيدخل بحتة راب بتوصل نفس المعنى

و اللي هو المفترض يعني كلام بيمثل ال brand و رحلتها في خلال ال 5 سنين اللي فاتوا و نظرتها للي جاي

و في النهاية على لسان هند صبري بيأكدوا إن التحدي مكانش سهل ولكن بكل فخر و حب النهاردة وصلوا لخدمة 12 مليون مصري

دة باختصار ملخص الإعلان

----------------------------------------------------------------------------------------

الإعلان من إنتاج شركة Synergy Advertising

و اللي كانت بتحتفل في نهاية السنة اللي فاتت بحصول إعلانهم برضه مع we بالمركز التاني عالمياً على Youtube في قائمة الإعلانات الأكثر مشاهدة


تنفيذ Key Films Tv

و اللي كانوا مسؤولين عن أغلب إن لم يكن كل شغل we الفترة اللي فاتت حتى اللي كان خارج إطار شركة Synergy زي إعلان أكرم حسني اللي كان مع bubblegum


إخراج مروان حامد

Production Design محمد عطية

مدير التصوير Thomas Buelens Sbc

Post Production & VFX by: AROMA

مونتاج أحمد حافظ

Color Grading أحمد عصام

كلمات الأغنية لمنة القيعي و تامر حبيب

ألحان:إيهاب عبدالواحد

توزيع: علي فتح الله


مجموعة الحقيقة مجرد وجود أسمها على عمل بيشكل عامل حماس للمشاهد.. و ضمان إنه هياخد الحد الأدنى من الجودة اللي يستحقها.


و من هنا يأتي السؤال


هل الإعلان حلو؟

----------------------------------------------------------------------------------------

الحقيقة إن دة سؤال إذا سمحتولي بحسه سطحي.. و مبني على عامل التفضيلات الشخصية.. بجانب نقطة تانية وهي.. إن حلو و وحش دي تشمل عوامل كتيرة أوي.. لو وحش في المطلق يبقى أنا بظلم عوامل كتيرة.. ولو حلو في المطلق يبقى أنا بغفل نقاط كان ممكن تكون أحسن.


و لكن لو أنت من محبي الإجابات المختصرة يبقى الإعلان مش بطال.. مش واو و مش وحش.


لحد هنا إنت كدة خدت الإجابة المريحة.


نيجي بقى لنص الإجابة التاني.. مع التعليل.. ليه الإعلان مش بطال؟


مش بطال لأن عناصره أغلبها حلو.. بس كان في أحسن كتير.


الكلمات مثلاً.. لا بأس بها.. بس مش على المستوى المتوقع من منة القيعي و تامر حبيب


لو دة اللي كانوا عاوزينه كانوا يجيبوا أي حد يكتب و خلاص.. و دة تاني مش تقليلا منهم.. و لكن عندهم أفضل من كدة.


أنا بقيت بحس إن الناس بتقعد في اوضة ال meetings تقترح اسم منة بس عشان هي trend.. زي فترة أيمن بهجت قمر و أمير طعيمة


أنا الشعور اللي وصلي إنها اتعملت كنحتاية.. حتى لحد وقت كتابة الحلقة دي منة نفسها مكانتش نزلت ولا شيرت الإعلان عندها.


حتى تامر حبيب لما عمل ٣ دقات و إعلان we قبل كدة كان في حاجة أجمل.. بصمة واضحة.


طبعاً النحت مش عيب.. و كلنا بننحت.. بس لو اسمك هيتحط على منتج لازم تكون ضامن إنه هيضيف لرصيدك مش هينتقص منه.


نقطة كمان و هي اختيار الممثلين.. أنا فاهم إن الموضوع بالأساس بيكون مرتبط بموافقة أو رغبة ال client لأن دة في النهاية إعلان مش فيلم.. بس أنا مبحبش الاستسهال.. اللي هو إحنا هنجيب مين celebrity؟


أنا دي حضرتها بنفسي.. في ناس بتختار ال celebrity و بعدين تشوف الفكرة هتكون إيه!

لأسباب بقى مختلفة.. أصل إحنا معانا رقمه فهيرد علينا.. أصل هو مش هياخد كتير.. أو إن ال client حاطت budget كزا للنجوم و هنشكله بيهم.. و تاني دي مش توقعات.. دة في كتير من الحالات بيحصل.. مش بأكد إن دة اللي حصل في case we.

لكن أنا حقيقي مفهمتش سبب اختيار الممثلين.. و ملقتش عامل ربط بينهم يكون بيخدم insight الإعلان

إيه علاقة نادين نجيم بهند صبري بعمرو سعد؟ أيوة إيه العامل المشترك؟ و ليه؟ نادين ظهورها لطيف.. مأزعجنيش.. لكن هند صبري في sequence استعراضي ليه؟! هند صبري نجمة كبيرة و ممثلة مقنعة جداً.. بس مش في دور استعراضي.. لدرجة إني شاكك إن في اللقطات الواسعة أوي مكانتش هي و كانت dancer تانية..


و عمرو سعد مش شخصية إعلانية.. ممثل موهوب لكن مش وجه إعلاني.. و بالتحديد في إعلان زي دة.. ممكن في حالات تانية يكون مقنع.. لكن في الإعلان دة بالذات مكانش مقنع.


مروان موسى ظهوره مكانش مزعج بس مكانش واو.. و في مجهود واضح جداً في ال CGI من Aroma


الطف إطلالة كانت لهدى المفتي.. لذيذة و مقنعة و نقطة.


نور النبوي وجه محبوب و دمه خفيف و حضوره سلس.. لكنه لسة محتاج شوية وقت عشان يكون نجم.. يملك كل المقومات.. لكن اتقل على الرز يستوي.. و واضح إنه حاسس برهبة و مش واخد راحته و دة تحسه لما المخرج يقرر إنه ميقطعش عليه في لقطات ضيقة أو يسببه وقت طويل على الشاشة.. على عكس هدى المفتي.. اللي متعودة على الإعلانات من قبل ما تكون ممثلة.


و بالتالي لو جينا نلخص اللي كان ينقص الإعلان دة فمن وجهة نظري هو معالجة أقوى للفكرة بشكل يليق مع مرور ٥ سنين على الشركة في مصر و تنعكس المعالجة دي على كلمات اغنية ثرية و أقوى من كدة.. و storyline أوضح يساعد اللي بيكتب.. مش مجرد هنجيب ممثلين نحطهم في locations روشة عاملها محمد عطية و شكراً على كدة.. و لو مصرين على وجود celebrities فعندنا insights كتيرة نختار على أساسها مش مجرد اختيار عشوائي.


42 views0 comments
bottom of page