top of page
  • Mohamed Ahmed

تحديثات وسياسات فيسبوك الجديدة يناير 2023

Updated: 5 days ago


"إحنا مهر مبندفعش.. شبكة مبنجيبش.. و الفاتحة مش حافظينها"

علاء ولي الدين.. من فيلم عبود على الحدود

----------------------------------------------------------------------------------------

من فترة شركة meta نزلت تحديثات للسياسات الإعلانية.. واللي هيتم تفعيل العمل بيها بداية من 3 يناير.


آه سمعت حاجة زي كدة فعلاً.. بتقول إيه بقى التحديثات دي؟


مضمون التحديثات دي يا سيدي هي كالآتي

1- مبدئياً كدة إحنا مش مغسلين و ضامنين جنة.. هنديلك تقديرات للنتايج بتاعت إعلانك آه.. لكن أفرض مجاتش.. هنعمل إيه؟!! نموت نفسنا يعني!!


2- لسانك يبقى حلو كدة و تشغل دماغك و تتأكد إن إعلاناتك تتوافق مع سياستنا؟ إيه هي سياستنا؟ بص هو إحنا منعرفش بس إنت حاول تقعد بأدبك.. ولو الإعلان مش على مزاجنا هنحذفه.. لأي سبب كان.. والله العظيم بجد قايلين كدة.. نصاً قايلين

“We may reject or remove any ad for any reason.”

تحية لسوكة ملهمة مارك زوكربرج و من قبله ويجز بسياسة.. أهو كيفي كدة.


3-حوارات الضرايب دي متصدعوناش بيها.. كل واحد و نظام بلده.. خلص حواراتك مع بلدك و إحنا لو حبينا نفرض عليك ضرايب هنبقى نقولك.


4- متقعدش رايح جاي كتير.. تقفل الإعلان و تشغل الإعلان.. و اعمل حسابك.. لو وقفت الإعلان هيفضل شغال ييجي بتاع يوم بعدها كدة و هنفضل نسحب فلوس حساب اليوم دة.. طب ليه مش هتوقفوه في ساعتها؟

أهو كيفي كدة

--------------------------------------------------------------------------------------

الحقيقة إحنا نفضل إننا نكتفي بهذا القدر لأن كدة كدة التحديثات ظاهرة عند كل مستخدمي فيسبوك و شركة Meta.. حبينا بس نوضح إن مفيش أي مبالغة مننا في عرض القرارت دي لأن فعلاً اللغة المستخدمة جافة إلى أقصى درجة.. و بصراحة عجيبة.


تحس في نهاية كل جملة بيقولك.. و إذا كان عاجبك.. دة فيما يخص الطريقة و بعيداً عن مضمون القرارات نفسها و اللي ميعبرش إنها قرارات غريبة أو صادمة.. أصل تعالى نحسبها بالعقل كدة.. السوق الإعلاني زمان.. هتعمل الإعلان في التليفزيون أو الراديو أو في الشوارع.. هتدفع أضعاف أضعاف ال Digital و النتيجة مش مضمونة.. و خطوات ال Targeting تقريبية جداً و قائمة على التوقعات مدعمة بما هو أشبه بتحليلات.. و تأثير دة على المبيعات غير مؤكد.


طب بالنسبة لل digital.. هل الشركات دي مفتوحة كعمل خيري؟ مش إنت لما بتعمل الإعلان بيجيلك مبيعات؟ خلاص.. Meta بتقولك بالبلدي كدة "فيها لأخفيها".. و المستقبل لا يحمل سيناريوهات أفضل.. على صعيد باقي المنصات بالمناسبة.. مش بس meta.. و اللي طاير ب Tik Tok و Google Ads دلوقتي.. فهي كمان بعد فترة وضعها مش هيكون مختلف.. كل البوادر بتمهد لدة.


طب و الحل؟! بيوتنا هتتخرب؟


الإجابة لأ.. و لكن على المسوق إنه يدرك إنه "مسوق" مش بس بتاع Digital.. و على رأي المثل..

It's not about the tools.. It’s a mind set



5 views0 comments
bottom of page